کراچی میں بارش کے بعد بجلی کا بحران شدت اختیار کرگیا. کئی علاقے 2 روز بعد بھی بجلی سے محروم ہیں۔منگل کی بارش کے بعد کراچی کے متعدد علاقوں میں بجلی اب تک بحال نہ کی جاسکی۔ بدھ کے روز کے الیکٹرک حکام نے شہر کے 94 فیصد سے زائد علاقوں کو بجلی کی فراہمی بحال کرنے کا دعویٰ کیا تھا۔کے الیکٹرک کے چیف ایگزیکٹو مونس علوی نے دعویٰ کیا ہے کہ بدھ کی شام 6 بجے تک شہر کے 94 فیصد سے زائد علاقوں کو بجلی کی فراہمی بحال کر دی گئی تھی۔مونس علوی کے مطابق شہر کے تقریباً 150 فیڈرز پر بجلی بحالی کا کام جاری ہے بارش کی وجہ سے کے الیکٹرک فیلڈ اسٹاف کو آمدورفت میں شدید مشکلات کا سامنا تھا۔جبکہ صدر میں رتن تلاؤ، اردو بازار، ملیر عالمگیر سوسائٹی، کشمیر کالونی سیکٹر بی، جیل روڈ، جمشید روڈ، المسلم ہاؤسنگ سوسائٹی اسکیم 38، گلستان جوہر بلاک 8، جوہر بلاک 2، بلاک 3 اے، نارتھ ناظم آباد بلاک جی، ایف، عمر کالونی، درویش کالونی، پی ای سی ایچ ایس بلاک سیون، مرچنٹ نیوی سوسائٹی اسکیم 33 سیکٹر 15 اے، لیاقت آباد سی ون ایریا سمیت متعدد علاقوں میں منگل سے بجلی معطل ہے۔علاقہ مکینوں کا کہنا ہےکہ صبح 5 بجے چند لمحے کے لیے بحال بجلی پھر بند ہوگئی متعدد بار شکایات کے باوجود فالٹس درست نہیں کیے جا رہے۔
