کراچی میں مشتعل افراد نے ایک اور واٹر ٹینکر جلادیا.سخی حسن کے قریب فائیو اسٹار گلیکسی شادی ہال کے سامنے مشتعل افراد نے واٹر ٹینکر کو آگ لگا دی۔ واقعہ اُس وقت پیش آیا جب ٹینکر نے مبینہ طور پر پیچھے سے ایک شہری کو ٹکر ماری جس کے بعد صورت حال کشیدہ ہو گئی۔ پولیس کے مطابق واٹر ٹینکر نمبر JQ0458 پاپوش نگر سے آ رہا تھا جس نے چاندنی چوک کے قریب مبینہ طور پر عمران نامی شہری کو ٹکر ماری جس سے شہری معمولی زخمی ہوا۔عینی شاہدین کا کہنا ہے کہ حادثے کے بعد مقامی افراد نے ٹینکر کا تعاقب کیا اور تھانہ شاہراہِ نور جہاں تھانے کی حدود فائیو اسٹار چورنگی کے قریب ڈرائیور نے خوفزدہ ہو کر ٹینکر کی رفتار بڑھا دی اور فرار ہونے کی کوشش میں اور ٹینکر تیز رفتاری سے فٹ پاتھ ٹکرا کر سڑک پرالٹ گیا .پولیس کا کہنا ہے کہ جب فائیو اسٹار چورنگی کے قریب تیز رفتاری کے باعث ٹینکر الٹ گیا تو شہریوں نے اسے آگ لگا دی۔ ڈرائیور کو تشدد کا نشانہ بنایا تاہم ڈرائیور موقع پا کر فرار ہوگیا۔ ٹینکر ڈرائیور عرفان معمولی زخمی حالت میں عباسی شہری اسپتال پہنچ گیا ہے جہاں ضابطے کی کارروائی کے بعد زخمی کو طبی امداد فراہم کی جارہی ہیں۔پولیس اسٹیشن شارع نورجہاں کی نفری موقع پر پہنچ گئی اور جائے وقوعہ سے شواہد اکٹھے کر لیے گئے ہیں۔ ایس ایچ او عابد شاہ کے مطابق واقعے کی تحقیقات جاری ہیں اور ملوث افراد کی شناخت کے لیے سی سی ٹی وی فوٹیج حاصل کی جا رہی ہے۔
