پاکستان تحریک انصاف نے پانچ اگست کو اسلام آباد میں جلسہ کرنے کا اعلان کردیاجبکہ اسلام آباد کے ایف نائن پارک میں 5 اگست کو جلسہ کرنے کی اجازت بھی مانگ لی۔پی ٹی آئی اسلام آباد ریجنل کے صدر عامر مسعود مغل نے جلسے کی اجازت کے لیے ڈپٹی کمشنر اسلام آباد کو باضابطہ درخواست دے دی درخواست پر عامر مسعود مغل اور جنرل سیکرٹری ملک عامر علی کے دستخط ہیں۔پی ٹی آئی نے درخواست میں کہا ہے کہ اسلام اباد میں پانچ اگست کی شام چار سے 10 بجے کے لیے ایف نائن پارک میں جلسہ کرنے کی اجازت دی جائے۔درخواست میں مزید کہا گیا کہ ضلعی انتظامیہ اورقانون نافذ کرنے والے اداروں کے ساتھ تعاون کیا جائے گا شرکا کے تحفظ کو یقینی بنانے کے لیے سیکیورٹی فراہم کی جائے۔درخواست میں یہ بھی کہا گیا کہ پبلک سیفٹی اور پارک کے استعمال کے تمام قواعد و ضوابط پر عمل درآمد کیا جائے گا۔
