ضلع مظفرگڑھ کا امیر ترین اور منفرد انداز میں بھیک مانگنے والا معروف بھکاری شوکت ٹریفک حادثے میں ہلاک ہو گیا۔ حادثہ موضع جھینگر ماڑھا کے قریب اس وقت پیش آیا جب شوکت اپنی موٹر سائیکل پر سوار تھا اور ایک لوڈر رکشے سے جا ٹکرایا۔ ریسکیو ذرائع کے مطابق شوکت بھکاری موقع پر ہی دم توڑ گیا.شوکت بھکاری مظفرگڑھ اور ملتان کی سڑکوں پر اردو اور انگریزی میں بھیک مانگنے کے انوکھے انداز کی وجہ سے مشہور تھا.شوکت کا کہنا تھا کہ وہ ہمیشہ صرف ایک روپیہ مانگتے ہیں اور جب لوگوں کے پاس ایک روپیہ نہ ہو تو وہ انہیں دس روپے دے دیتے ہیں۔ اس چالاک حکمتِ عملی کے باعث وہ بھکاری کم اور ایک سیلف برانڈڈ ماہرِ فنِ بھیک زیادہ نظر آتے تھے۔وہ اکثر لوگوں کو نہ صرف اپنے مانگنے کےفن سے آگاہ کرتے بلکہ فخریہ طور پر اپنے بینک اکاؤنٹ میں موجود لاکھوں روپے کا بھی ذکر کرتے اور بینک اسٹیٹمنٹس دکھاتے تھے۔اہلِ علاقہ کے مطابق شوکت شاہ جمال کے رہائشی تھے تین بچوں کے باپ تھے اور نہ صرف بینک بیلنس رکھتے تھے بلکہ کئی ایکڑ زرعی زمین کے بھی مالک تھے۔
