ٹک ٹاکر، یوٹیوبر اور سوشل میڈیا اسٹار جیمز اسٹیفن جمی ڈونلڈسن المعروف مسٹر بیسٹ نے سعودی عرب کے دارالحکومت ریاض میں ایک عارضی تفریحی پارک بیسٹ لینڈ کا افتتاح کیا ہے. جو مداحوں کے لیے دلچسپ رکاوٹیں اور چیلنجز پیش کرتا ہے۔بیسٹ لینڈ 13 نومبر سے 27 دسمبر تک ریاض سیزن کا حصہ رہے گا۔ اس پارک میں مسٹر بیسٹ کی ویڈیوز کی طرز پر مختلف رکاوٹیں اور چیلنجز بنائے گئے ہیں جن میں حصہ لینے والے مداح بڑے انعامات جیت سکتے ہیں۔یہ پارک ریاض سیزن کا حصہ ہے جو ایک سالانہ میلہ ہے اور دارالحکومت کو سیاحتی مقام بنانے کے لیے منعقد کیا جاتا ہے جس کے ذریعے سعودی عرب مشہور شخصیات کو مدعو کر کے اپنی معیشت کو تیل پر منحصر ہونے سے آزاد کرنے کی کوشش کر رہا ہے۔مسٹر بیسٹ نے کہا کہ ان کے زیادہ تر ناظرین شمالی امریکا سے باہر ہیں، جبکہ مشرقِ وسطیٰ میں بھی ان کے مداحوں کی بڑی تعداد موجود ہے، اسی لیے وہ ریاض میں شائقین کے لیے کچھ خاص کرنا چاہتے تھے۔اس سے قبل مسٹر بیسٹ نے پارک کے دروازے کے سامنے ایک ویڈیو بھی شیئر کی، جو نیلے شیر کے سر کی شکل میں ہے اور آنکھوں میں چمکتی ہوئی بجلی کی روشنی ہے جو ان کے لوگو کی یاد دلاتی ہے۔مسٹر بیسٹ کے مطابق بیسٹ لینڈ ان کی زندگی کا سب سے منفرد پروجیکٹ ہے اور وہ دیکھنے کے منتظر ہیں کہ لوگ اس تجربے کو کیسا سمجھتے ہیں۔
