مہاجر قومی موومنٹ کے چیئرمین آفاق احمد کو انسداد دہشتگردی منتظم عدالت میں پیش کردیا گیا۔ انہیں سخت سیکیورٹی میں بکتر بند گاڑی کے ذریعے عدالت لایا گیا جہاں بڑی تعداد میں کارکنان عدالت کے باہر موجود تھے.گزشتہ روز گرفتاری کے بعد آفاق احمد کو نامعلوم مقام پر منتقل کر دیا گیا تھا۔آفاق احمد پر الزام ہے کہ انہوں نے عوام کو اشتعال دلا کر کراچی میں ہیوی ٹریفک کے خلاف کارروائیوں پر اکسایا جس کے نتیجے میں مال بردار گاڑیوں کو نذر آتش کیا گیا۔ پولیس کے مطابق، کورنگی میں ٹرک جلانے کے مقدمے میں انہیں گرفتار کیا گیا ہے اور ان کے خلاف جلاؤ گھیراؤ کی دفعات کے تحت مقدمہ درج کیا گیا ہے۔واضح رہے کہ گزشتہ روز ہی کراچی میں ٹریفک حادثات کے بعد مشتعل افراد نے متعدد مال بردار ٹرک اور واٹر ٹینکرز کو نذر آتش کر دیا تھا جس کے بعد ٹرانسپورٹرز نے احتجاجاً مختلف شاہراہوں پر دھرنا دیا۔
